英超半季回首之二

一月二日, 踢了個多鐘頭波。有1g1a, 不錯的成績。( 同場有一班唔知交安定民安隊練緊操, 本來好有衝動入波後走過去扮迪維斯慶祝, 不過最後我既腦前葉都係叫我唔好拿朋友們的面子來較飛 ) 不過過去實在太少運動, 再加上淋了少少雨。今天頭痛得不得了, 成身亦腰酸背痛。幸好休息了一天, 已然恢復了不少。

講埋其他果十幾隊英超啦, 其實雖然我隊隊都有留意下, 但始終係無咁深印象。所以挑d我記得既重點講下啦。

伯明翰：我認為係本地足球盛事啦，有香港人買左隊英超波，重踢得唔錯添，而家係第８，同對上一隊既利物浦差１分。但係楊生好似無諗過要同本地球迷分享，似係想當個人功積多Ｄ。ANYWAY, 隊波既成績真係唔錯。 令人印象深刻d既球員係班尼迪斯d快放同s拿臣d神經刀中距離。 另外防守上亦都失球不多, 除左後衛們做到野之外, 門將祖赫特都係功不可沒既。

般尼：另一對升班馬，呢隊真係名不經傳，但係上到嚟第二場就令曼聯輸波，勁！其實都係穩打穩紮，手上有一球多數就開始守咁既類型既波。唔係話特別凸出，但使用主場優勢，加埋各隊季初都對佢地有少少輕敵，咁就令佢地都有五勝五和既中等成績。

曼城：今年季初發癲咁買人，我直頭唔多記得佢地上年有ｄ咩人。今年實力大進，但成績依然一般。係咪真係要夾呢，班前鋒唔係好夾，後防真係好在有基雲頂頂，高路托尼同尼斯鈺好似都係無乜默契。成村前鋒，輪換都要輪兩三輪先輪到一個，但後衛（佢會用的）卻又少得可憐。都唔知佢地可以點樣夾。

阿士東維拉：季初開得好好，今季仲係Big 4 Killer 添。少左巴利對佢地影響好似唔大，有占士米拿今年突飛猛進同ａ楊兩邊翼做到野。後衛鄧尼同占士哥連斯都守得好穩陣。令佢地響失球甚少的情怳下而家企到響第６位。

熱刺：熱刺今年個情況同維拉有ｄ似，佢地都係隊波既默契同信心都加強左，所以實力亦都加強左，最強緊係入９球果場，迪科爾上晒身，羅比堅尼其實都有場有唔知三定四球。但係總之前鋒實力好強。今年加入既卡蘭積卡又係買得抵，不過我都係鐘意摩迪多ｄ。而家熱刺既整體實力，連埋板凳深度其實同ｂｉｇ４都不惶多讓（一定好過利）。

好了，寫到呢度，其他球隊都係無乜特別感受。概括就算。
愛華頓：跌watt。靠祖奧入到波真係無乜可能。但沙夏同派拿就做到野。好憎費蘭尼，高大衰。
保頓：又係大跌watt，防守好似罷工咁。李青龍可以成為札智星之後另一韓國巨星。
韋根：其實各個球員都好有可塑性，但真係好唔穩定。
樸茅：近況有ｄ起色，但又傳出將會破產，真係命途多舛。
韋斯咸：其實打得唔錯：但係鋒力真係相對較弱。加上主力們經常受傷，所以幾難對強隊作出威脅。
狼隊：可以出晒一隊ｂ隊，深明兵法奧義的領隊。
候城：整體實力較弱，上年僥倖不用降班，今年．．．．．．
史篤城，布力般，新特蘭，富咸等都係有個別球員比較特出。但其他則不對我留下深刻印象。

展望：曼聯衛冕不能。利記重返頭４。車仔奪盃。睇下即將來臨既轉會有無乜野大變更啦。